جولشيەۆ «اقتوبەدە» ويناي ما؟

«اقتوبە» فۋتبول كلۋبىنىڭ ديرەكتورى ماقسات تۇيماليەۆ باۋىرجان جولشيەۆتىڭ كومانداعا قوسىلۋى جايلى پىكىر ءبىلدىردى. بۇل تۋرالى vesti.kz حابارلادى. وسى ايدىڭ باسىندا فۋتبولشى تۇركياداعى وقۋ-جاتتىعۋ جيىنىن وتكىزىپ جاتقان «اقتوبەگە» قوسىلعانى حابارلانعان بولاتىن. ماقسات تۇيماليەۆتىڭ ايتۋىنشا, قازىرگى ۋاقىتتا باۋىرجان جاقىندارىمەن كەڭەسىپ الۋ ءۇشىن كوماندادان كەتكەن كورىنەدى. «باۋىرجان «اقتوبەدە» ويناۋعا دايىن ەكەنىن ايتىپ, بىزگە كۇتپەگەن جەردەن قوسىلدى. ونىمەن كەلىسىمشارتتىڭ قارجىلىعىق جاعىن دا اقىلداسپاعان ەدىك. ول جاتتىعۋعا بىردەن كىرىسىپ كەتتى. سودان كەيىن بارىپ وعان قولىمىزدان كەلەتىن ۇسىنىس جايلى ايتقان ەدىك,ول جاقىندارىمەن كەڭەسىپ العاننان كەيىن ناقتى جاۋاپ بەرەتىنىن ايتتى. قازىر ول كوماندامىزدا جوق. جولشيەۆ تۋرالى ازىرگە وسى مالىمەتتەردى عانا ايتا الامىن», – دەدى تۇيماليەۆ. ايتا كەتەيىك, جولشيەۆ وتكەن ماۋسىمدا مۇلدەم الاڭعا شىقپادى. دەگەنمەن, ونىڭ «ەرتىس», «ورداباسى», «قايرات» كلۋبتارىمەن كەلىسسوز جۇرگىزىپ جاتقانى تۋرالى حابارلانعان بولاتىن.